Urrutira bidalia: 12 (Poesía) - Softcover

Li Bairen poesia, oso antzinakoa izan arren, gaur egun ere argitaratu egiten da eta munduko hizkuntza gehienetan sekulako arrakasta du. Hori da bere miraria. Darabiltzan gaiak grina unibertsalei lotuak daude: aldiaren iragaitea, adiskidetasuna, banatzearen samina, gerratearen doilorkeria, naturaren kontenplazioa, horditzearen onura... Eta, forma aldetik, estetika piktoriko bati atxikia dagoela esan behar da, kultura txinatarrean ohikoa den bezala. Itxuraz oso bestelako poesia badirudi ere, Li Bairen poemek ustekabea eragiten dute, zerbait dejá vu izateak sortzen duen asalduraren antzekoa, jakin bagenekizkien baina ahaztuta ere bageneuzkan zerak direla ohartzean.

Li Bai (edo Li Tai Bo), VIII. mendeko poeta txinatarra. Tang dinastiako -txinatarren literaturan urrezko aroko- poetarik gorenetakoa, Du Fu, Su Dongpo eta Wang Wei-rekin batera. Urteetan ezezaguna izan da mendebaldean, harik eta, XX mendearen hasieran, Ezra Pound-ek kultura modernorako deskubritu zuen arte. Orduz geroztik asko izan dira bere obraren itzulpenak.